الأخبار

طالب ثانوي يخترع ميكروباص جميع مقاعده جنب السواق

كتب : عمرو عيسى

طالب ثانوي في الصف الثاني وعمره 16 عام إلا بضعة أشهر قرر أن يفيد محافظته المنوفية في المقام الأول، والبشرية كلها في المقام الثاني.. فاخترع ميكروباص جميع مقاعده بجوار السائق منعاً للمشاكل والقيل والقال، وخلافات الركاب التي لا تنتهي على المقعد المميز.

 

المعلومة أكدها لنا الزميل الصحفي حسن معروف الذي رفض الإفصاح عن اسم الطالب
وبياناته، كل ما قاله لنا بالحرف أن “طالب ثانوي أخترع ميكروباص جميع مقاعده جنب السواق”
ولم يزد.. وذلك لرغبته في بيع الخبر لجريدة منافسة بسعر خيالي لا تستطيع ميزانيتنا
المتواضعة تحمله.. شكراً حسن معروف.

 

رأي الجمهور في الاختراع العظيم

الجريدة الصفرة نزلت الشارع، وسالت الجمهور عن رأيه في الاختراع الذي من المقرر أن  يغير
خريطة الركاب في ميكروباصات مصر تغيير جذري وحرفي.

 

الكثير من الآراء كانت تافهة وسطحية وبلا أي قيمة، لذلك اقتطعنا منها الآراء المهمة فقط لنعرضها على حضراتكم.

 

موظف على المعاش 65 سنة:

ــ ولا له أي لازمه خالص، كله كلام فاضي.. يعني أحنا دلوقتي لما هنقعد كلنا جنب السواق كل ما حد عاوز ينزل بقى هينزل كل الناس؟

 

سيدة ربة منزل 49 سنة:

لا يا خويا دي تبقى قاعده كلها تلزيق، والدنيا حر.. نفطس كده

 

شاب جامعي 20 سنة:

معلش هي فكرة كويسة بس نبص لها بشكل عام.. أنا دلوقتي لو جيت أولع سيجارة بيبقى عادي عشان أنا قاعد جنب السواق، إنما لو كلنا هنقعد جنب السواق مش هيبقى عادي.. ولا هيبقى عادي؟ .. هيحصل أيه طيب؟

 

رأي سائقي الميكروباصات

سألنا مجموعة من سائقي الميكروباصات وحذفنا كل الآراء التافهة كما فعلنا مع الجمهور.. ولكن هنا حذفنا أيضاً كل الكلام الذي نصفه همهمة وتوهان وجمل غير منطقية، فبقي القليل نعرضه عليكم.

 

سائق على خط أحمد حلمي الجيزة 35 سنة

لا معلش.. اللي يركب قدام ياخد الكرسيين.. هتبقى العربية كلها قدام؟ .. برضو واحد بس يركب وياخد العربية كلها.

 

سائق على خط حلوان 15 مايو  29 سنة

اخويا الزبون معلش في الكلمة تريحه يتعبك.. هنقعدهم قدام بقى وطول الطريق لوك لوك لوك أنا مفياش دماغ للكلام ده، لا ده أنا أبطلها خالص وييجي صاحبها يستلمها م الموقف.

 

سائق على خط العمرانية الداخلي 47 سنة

ياكشي تخرب.. قال يعني كده الزبون مش هيتعوج.. عليا النعمة هيتعوجوا برضو.. وكل واحد فيهم هييجي يقول لك أنا عاوز أقعد جنب الشباك يا راجل بلاش (تيــــــت) دي عالم (تيــــــــــــــــــــــــــــــــــــــــــــــــت)…..

الوسوم

عمرو عيسى

كاتب محترف له خبرة كبيرة في كتابة المحتوى بكل مصداقية ويسعى لنقل المعلومات والأخبار بكل شفافية وصدق

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *